ଆଜକୁ ଠିକ୍ ଏକ ବର୍ଷ ପୂର୍ବେ ଅର୍ଥାତ ୨୦୨୨ ମେ’ ୧୭ ତାରିଖରେ ଭାରତୀୟ ସେୟାର ବଜାରରେ ସବୁଠାରୁ ବଡ ଆଇପିଓ ଭାରତୀୟ ଜୀବନ ବୀମା ନିଗମ ବା ଏଲଆଇସି ଲିଷ୍ଟିଂ ହୋଇଥିଲା । ନିବେଶକମାନେ ଭଲ ଲାଭ ଆଶାରେ ଏଲଆଇସି ଆଇପିଓରେ ନିବେଶ କରିଥିଲେ । ମାତ୍ର ଗୋଟିଏ ବର୍ଷ ପରେ ନିବେଶକମାନେ ନିରାଶ ହୋଇଛନ୍ତି । କାରଣ ଏଲଆଇସି ଆଇପିଓ ଏବେ ୪୦ ପ୍ରତିଶତ କ୍ଷତିରେ ଟ୍ରେଡିଂ ହେଉଛି ।
ଗୋଟିଏ ବର୍ଷ ପୂର୍ବେ ଆଇପିଓ ମାଧ୍ୟମରେ ୨୦୫୫୭ କୋଟି ଟଙ୍କା ବଜାରରୁ ଆଦାୟ କରିଥିଲା । କମ୍ପାନୀ ତରଫରୁ ପ୍ରତି ସେୟାରର ମୂଲ୍ୟ ୯୪୯ ଟଙ୍କା ରଖିଥିଲା । ହେଲେ ଷ୍ଟକ ମାର୍କେଟରେ ଲିଷ୍ଟିଂ ହେବାର ଗୋଟିଏ ବର୍ଷ ମଧ୍ୟରେ ଏଲଆଇସି ସେୟାର ୪୦ ପ୍ରତିଶତ କ୍ଷତିରେ ଚାଲିଛି । ଏଣୁ ଏବେ ପ୍ରତି ସେୟାରର କିଣା ମୂଲ୍ୟ ୯୪୯ ଟଙ୍କା ରହିଥିବା ବେଳେ ଏହା ୫୬୯ ଟଙ୍କାରେ ପହଂଚିଛି । ଆଇପିଓ ମୂଲ୍ୟ ହିସାବରେ କମ୍ପାନୀର ମାର୍କେଟ କାପିଟାଲାଇଶନ ୬ ଲକ୍ଷ କୋଟି ପାଖାପାଖି ଥିବା ବେଳେ ଏହା ଏବେ ୩.୬୦ ଲକ୍ଷ କୋଟିକୁ ଖସି ଆସିଛି । ଅର୍ଥାତ ଏଲଆଇସି ଆଇପିଓ ସେୟାର ମାର୍କେଟରେ ଲିଷ୍ଟିଂ ହେବାର ଗୋଟିଏ ବର୍ଷ ମଧ୍ୟରେ ନିବେଶକ ୪୦ ପ୍ରତିଶତ କ୍ଷତି ସହିଛନ୍ତି ।
